Mwana Wa Afrika

                     WAUOMBA MGODI WA NORTH MARA KUWAHAMISHA.

Dinna Maningo,Tarime. (Mwana wa Afrika blogsport.com)

WANANCHI wa Kitongoji cha Nyabichune Kijiji ch nyangoto-Nyamongo Wilayani Tarime wanaoishi jirani na Mgodi wameuomba Mgodi huo wa Dhahabu wa North Mara kuwahamisha  kwa madai kuwa maeneo wanayoishi ni maeneo hatarishi kwa maisha yao.

Walisema kuwa kutokana na shughuli za Mgodi na Mgodi huo kuwa jirani na makazi ya watu umekuwa ni kero kwao na hivyo kusababisha  wananchi kuishi kwa hofu kwa kuofia usalama wao.

Kuomba kuhamishwa kwa wananchi wa kitongoji cha  Nyabichune kumekuja baada ya kudaiwa kuporomoka mawe kutoka mgodini mara kwa mara  hadi kwenye nyumba za watu na kwamba siku chache zilizopita kuna jiwe kubwa liliporomoka na kubomoa sehemu ya nyumba ya Juma magabe anayeishi jirani na Mgodi huo.

“Mgodi unilipe fidia na kibidi utuhamishe maeneo tunayoishi ni hatarishi kutoka nyumbani kwangu ninakoishi ni hatua 5 hadi mgodini,kuna mawe yaliyoifadhiwa na yako mgodini ambayo hayana dhahabu yamekuwa yakipolomoka hadi kwenye nyumba zetu hivi karibuni majira ya saa 10 jioni liliporomoka jiwe kubwa likabomoa sehemu ya nymba ya mama yangu”alisema Juma magabe.

Aliongeza”ni hatari kwa maisha yetu kuna watoto ucheza kiasi kwamba ipo siku litamporomokea na kumuuwa  hali hiyo imesababisha mama ameogopa kuishi kwenye hiyo nyumba nimejaribu kufatilia Serikali ya kijiji Mtendaji akaniandikia barua ya malalamiko nikaipeleka mgodini lakini hadi sasa hakuna jitihada zozote zilizofanyika nia yangu naomba Mgodi unifanyie tathimini unilipe mimi na familia yangu tuhame”aliasema Magabe.

Mtendaji wa Kjiji cha Nyangoto Samwel Philipo alikiri kuwepo kwa tatizo la kuporomoka kwa mawe kwenye makazi ya watu na kuthibitisha kubomoka kwa Nyumba ya mkazi mmoja baada ya kudondokewa na jiwe nakwamba tayali alishawasiliana na mgodi ili kutatua tatizo hilo  ikiwa ni pamoja na kuutaka mgodi  kuwahamisha watu wote waishio maeneo hatarishi jirani na Mgodi.

Ghati Marwa mkazi wa kitongoji cha Nyabichune alisema kuwa mbali na kuporomoka kwa mawe pia shughuri za mgodi zimekuwa ni kero kwao hususani baruti zenye milio mikali na mitikisiko mikubwa zinazopigwa kutoka ndani na mgodi pamoja na mabomu ya machozi yanayopigwa hewani na Askari wanaolinda mgodi na kusababisha kusambaa kwa moshi unaoathiri afya zao.

Hata hivyo uongozi wa Mgodi wa North Mara ulikiri kuporomoka kwa mawe kwenye makazi ya watu ambapo walikiri kubomoka kwa nyumba baada ya kuangukiwa na jiwe kubwa lililotoka Mgodini ambapo walisema kuwa  wanafanya utaratibu ili kufanya tathimini kwa wakazi wa Kitongoji cha Nyabichune waishio maeneo hatarishi jirani na Mgodi ambapo tathimini hiyo itaambatana na malipo na kisha kuyahama makazi hayo yaliyo jirani na Mgodi.