WATU 22 WAUWAWA SYRIA

Takriban watu 22 wameuwawa katika msako wa vikosi vya serikali ya Syria katika mji wenye machafuko wa Hama, huku upinzani ukisusia mazungumzo ya kitaifa yanayodhaminiwa na serikali.

Shirika la Taifa la Kutetea Haki za Binadamu nchini Syria limesema katika taarifa ambayo nakala yake imepatikana na shirika la habari la Ujerumani, DPA, kwamba zaidi ya watu 50 wamejeruhiwa wengine wakiwa katika hali mbaya, wakati wa kuzima upinzani katika mji wa Hama.

Taarifa hiyo imeongeza kusema kwamba vikosi vya usalama vilivamia hospitali ya Al Hurani mjini humo, ambapo kulikuwa na maandamano makubwa dhidi ya utawala wa Rais Basher al Asaad hapo Ijumaa. 

Imekuwa vigumu kuthibitishwa kwa ripoti hizo kutokana na serikali ya Syria kuzuwiya vyombo vya habari vya kigeni kuingia nchini humo.