Mwana Wa Afrika

KIONGOZI WA UAMSHO ZANZIBARA AKUTANA

NA WAANDHISHI WA HABARI

 

Na Mohammed Mhina, Zanzibar

SIKU moja tu baada ya Rais wa Zanzibar Dkt. Ali Mohammed Shein, kuzungumza na Waandishi wa Habari Ikulu mjini Zanzibar kuhusiana na Vurugu zilizotokea wiki iliyopita, leo Kiongozi wa kundi la Uamsho Sheikhe Farid Hadi, amezungumza na Waandishi wa Habari na kusema kuwa wataendelea na harakati zao ya kupinga Muungano wa Tanganyika na Zanzibar mpaka kieleweke.

 

Sheikhe Farid ambaye amelaani vikali vitendo vya uharibifu wa mali ukiwemo wa uchomwaji moto magari na baadhi ya makanisa mjini Zanzibar, amesema pamoja na wao kulisaidia Jeshi la Polisi katika kukusanya taarifa za kuwabaini wale wote waliohusika na uharibifu huo, lakini pia wataendeleza harakati za kudai kura ya maoni ya kupinga Muungano wa Jamhuri ya Tanzania.

 

Ingawa alikataa wafuasi wake kushiriki katika vurugu, lakini amesema leo wanakesha msikitini kuwaombea heri vija wote waliokamatwa kufuatia vurugu hizo ili waachiliwe bila ya masharti.

 

Sheikhe Farid pia amewalaumu baadhi ya vijana wakiwemo wa chama kimoja cha siasa kuwa wao ni miongoni mwa wanzilishi wa vurugu hizo.

 

Amesema kwa hatua hiyo anajenga imani kuwa miongoni mwa watu waliochoma makanisa siku ya tukio hilo, walikuwa ni mmoja miongoni mwa vijana hao na wanakamilisha taarifa zao ili kuwapatia Polisi kwa hatua zao.

 

Amesema mbali ya kuwa Serikali imepiga marufuku mikutano na maandamano, lakini Jumuiya yao ya Uamsho itafanya Mhadhara mkubwa Jumapili Juni 3, mwaka huu kwenye Viwanja vya Lumbumba mjini Zanzibar mhadhara ambao utafuatiwa na  maandamamo yatakayofanyika Juni 26, mwaka huu.

 

Wakati wa mkutano huo, Sheikhe Farid pia amevilaumu baadhi ya Vyombo vya Habari hapa nchini na kusema wameandika habari zenye chumvi nyingi na kuupotosha umma kwa kuongeza hofu miongoni mwa wananchi wa ndani na nje ya Zanzibar.

 

Hata hivyo Shehe huyo ameshindwa kufafanua baadhi ya hoja alizoulizwa na waandishi wa habari kwa mfano kuzibwa kwa barabara kwa mawe na magogo ya minazi ama kuchomwa matairi na makanisa kuwa inauhusiano gani na madai ya kuwepo kwa muungano.

 

Mwisho

 

POLISI KIGOMA WAOKOA WATATU

WANAOTUHUMIWA KWA UCHUWI

Na Pardon Mbwate na Felister Chubwa, wa Polisi Kigoma

 

Jeshi la Polisi mkoani Kigoma limefanikiwa kuwaokoa watu watatu waliokuwa wamezingirwa na kundi la wananchi wakitaka kuwaua kwa tuhuma za kujihusisha na vitendo vya ushirikina.

 

Kaimu Kamanda wa Polisi Mkoani Kigoma SSP Joseph Konyo, aliwataja watu hao waliokolewa kuwa ni Evania Sephanga(50), mkazi wa wilaya ya Kibondo, Bruno January(46), mkazi wa kijiji cha Nyamhoza na mtoto mmoja mwenye umri wa miaka kumi na mkazi wa kijiji cha Nyamhoza Kigoma mjini ambaye jina lake linahifadhiwa.

 

Kamanda Konyo amesema kuwa wiki iliyopita majira ya saa tisa mchana, watu hao walizingirwa na kundi hilo kwa madai kuwa walimroga na kumuua msichana mmoja aitwaye Faines Zawadi(20) mkazi wa kijiji hicho cha Nyamhoza ambaye siku moja kabla ya kifo chake alionekana kama mtu aliyechanganyikiwa na kuwa kama kichaa.

 

Alisema katika tukio hilo, bibi kizee mmoja ambaye alikuwa mshirika wa kundi la waliodaiwa kuwa wachawi, alifanikiwa kutoroka katika mazingira ya kutatanisha alipojifanya kuwa anakwenda kujisaidia.

 

Kamanda Konyo amemtaja bibi huyo aliyefanikiwa kutoroka kuwa ni Bibi Editha Dosiyo mkazi wa kijiji hicho ambaye baadaye alipatikana na kuhojiwa kabla ya kukabidhiwa kwa Idara ya ustawi wa jamii baada ya kuonekana kuwa maisha yake yangekuwa hatarini.

 

Amesema baada ya Polisi kupata taarifa za tukio hilo, walikimbia na kwenda kuwaokoa kutoka katika mikono ya kundi la wananchi lakini wakiwa wameshaadhibu ingawa ilikuwa haijawa kwa kiasi kikubwa.

 

Habari zinasema kuwa, baadhi ya wananchi walipata taarifa kutoka kwa mtoto aliyeokolewa akisema kuwa baadhi ya watoto waliofariki kijijini hapo, akiwataja (majina tunayahifadhi) alikuwa akiwaona nyumbani kwao nyakati za usiku wakiosha vyombo na baadaye kupewa chakula.

 

Siku ya tukio hilo, baadhi ya wananchi walisema kuwa kabla ya bibi huyo kutoweka alimnong’oneza jambo mjukuu wake ili amfanyie mareheme ikiwa ni pamoja na kumruka mara saba kisha bibi huyo alitoweka akijifanya anakwenda kujisaidia.

 

Walisema mara baada ya bibi huyo kutoweka, mtoto huyo wa kiume ambaye ni miongoni mwa waliozingirwa wakitaka kuuawa, aliamza kutekeleza maagizo ya bibi huyo na alipomaliza kitendo cha kumruka kwa mara ya saba, msichana yuyo ambaye alikuwa ni marehemu alizinduka na kuomba uji.

 

Wamesema msichana huyo ambaye alikuwa mfu, alipewa uji na kunywa kisha akapelekwa hospitalini ambako hadi sasa hali yake inasemekana kuwa inaendelea vizuri.

 

Hata hivyo Kamanda Konyo ametoa wito kwa wananchi kuacha kuchukua sheria mkononi na badala yake watoe taarifa Polisi kwa kila jambo wanaloliona kuwa linaweza kuleta uvunjifu wa amani ili hatua za haraka zichukuliwe dhidi ya wahusika.

 

Mwezi uliopita watu wawili mke na mume, waliuawa na kundi la watu wenye hasira kisha miili yao kuchomwa kwa moto mkoani Kigoma baada wa kutuhumiwa kuwa walikuwa ni wachawi.

Mwisho