Mwana Wa Afrika

         WATENDAJI WATAKIWA KUSIMAMIA MAPATO NA MATUMIZI

Dinna Maningo,Rorya.

WATENDAJI wa vijiji na Kata katika kata ya Kisumwa Wilayani Rorya Mkoani Mara wametakiwa kusimamia vyema Mapato na Matumizi yatokanayo na vyanzo vya  ndani katika kukuza  Uchumi wa Wilaya ili kupata maendeleo endelevu.

 

Hayo yalibainishwa jana na Mkaguzi wa ndani wa Wilaya hiyo, Peter Chuwa,katika kikao na viongozi hao kilichofanyika katika Shule ya Sekondari ya Kisumwa iliyoko kata ya Kisumwa Tarafa ya Subha Wilayani hapa.

 

Alisema kila kiongozi anapaswa kutambua wajibu na dhana ya uwajibikaji katika Usimamizi wa ukusanyaji  wa mapato.

 

Aidha kwa upande wa usimamizi wa matumizi ya miradi ya ujenzi alisema sio mzuri kutokana na watu kutokuwa na dhana ya uwajibikaji na kutoweka kwa uadilifu hali inayosababisha Wilaya  hiyo kuwa nyuma kimaendeleo.

 

Akijibu hoja ya watendaji hao ya kutokuwa na elimu ya ujazaji wa vitabu vya fedha pamoja na utunzaji wa kumbukumbu za kihasibu, alisema kuwa hiyo ni changamoto kubwa inayokabili idara hiyo na kwamba inapaswa kuwepo kwa mafunzo kwa wasimamizi wakuu wa rasilimali fedha.

 

Aliongeza pia kuwa kutokana na kasumba ya maduka kutokuwa na risiti za fedha, watendaji hao wamekuwa wakitumia fedha hizo bila kuwepo kwa kumbukumbu yoyote hali ambayo inaweza kuleta utata wa matumizi ya fedha za Serikali na kusababisha kiongozi kupata tuhuma ya ubadhilifu wa fedha nahivyo kuwataka kutunza kumbukumbu hata kama ni kumbukumbu za kuandikishana na kuweka sahihi bila risiti.

 

Kwa upande wa Watendaji nao walilamikia kuwepo kwa ucheleweshaji wa asilimia 20 ya mapato yanayoingia kila mwezi katika mfuko wa kila kijiji hali inayowanakatisha tamaa kwa kuendelea kuwatumikia wananchi huku wakiwa na mazingira  magumu ya kazi hali ambayo inachochea kuwepo kwa mianya ya rushwa.

 

Naye Mjumbe wa Dawati la kuzuia ukatili wa kijinsia, Neema Antony aliwataka watendaji hao kufikisha ujumbe kwa wananchi kuwepo kwa Dawati hilo maalumu kwa kusaidia baadhi ya familia zinazokuwa na unyanyasaji ili  kutatua matatizo yao yanayokuwa yakiwakabili hasa wanawake ambao wamekuwa wakipata vipigo kutoka kwa waume wao, pia wanaume ambao nao wanapata vipigo kutoka kwa wake zao.

 

Alisema Dawati si sehemu iliyotegwa katika  Jeshi la Polisi pekee bali pia wananchi wanaweza kuanzisha ili kutatua kesi za unyanyasaji wa kijinsia, na watoto pamoja na kurithi wajane. 

 ,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,MWISHO,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,