Mwana Wa Afrika

Tarime.

BAADHI ya Wazazi wa Wanafunzi wanaosoma Shule ya Msingi Kiongera Kata ya Susuni Wilaya ya Tarime Mkoani Mara wameulalamikia uongozi wa shule hiyo kuwatumikisha Wanafunzi kufanya kazi mbalimbali za walimu.

Wakiogea na gazeti hili walisema kuwa Wanafunzi wa shule hiyo wamekuwa wakifanyishwa kazi nzito za shamba pamoja na kuagizwa vitu mbalimbali kwa maslahi ya walimu.

“Wanafunzi wanafanyishwa kazi kiasi kwamba hata kupata  ile nafasi ya kujisomea inakosekana  sasa hivi ni kipindi cha palizi za mashamba watoto wanaenda kupalilia mashamba ya walimu wanalima toka asubuhi hadi saa nne”alisema Joice Bhoke.

Chacha Mwita alisema kuwa mbali na wanafunzi hao kupariria mashamba ya walimu pia wamekuwa wakivuna mazao nyakati za mavuno hali ambayo inawafanya kuichukia shule na wengine kutoroka shuleni.

“Wanafunzi wamegeuzwa vibarua mazao yakikomaa wao ndio wavunaji wanavuna mahindi  wanabeba toka mashambani wanapukuchuwa mtoto anafika  nyumbani vidole vinauma kama kipindi mashamba yamebana watoto wanafanyishwa kazi kama punda akifika nyumbani unamwonea huruma inabidi apumzishwe na kazi za nyumbani kutokana na uchovu”alisema Mwita.

Wazazi hao walisema watoto hao wamediriki hata kuwatekea maji walimu ambapo pia wamekuwa wakiagizwa kupeleka kuni,fito za kujengea majiko au kuzibia uzio wa nyumba na mashamba yao.

“Watoto wanafundishwa kazi nzito wakati huo huo wanaagizwa vitu mbalimbali mtoto huyo huyo unamkuta amebeba Jembe,wakati huo huo ana galoni limejaa maji,ana Panga,hapo hapo amebeba Madaftari analemewa na mizigo akifika shuleni anakuwa hoi watoto wengine wanatoka umbali mlefu bado anatakiwa aingie darasani kusoma wakati huo bado anatakiwa kufanya shughuli za shule na za walimu za kuwasombea maji visimani,Nyumbani kazi zinamsubiri yeye kama unavyojuwa maisha ya vijijini tukiwazuia walimu hawafundishi na tatizo hili ni kwa shule zote za hapa katani “alisema Nchimbya Muhoni.

Pia Shule ya msingi Kikomori,Nyabirongo na Matamankwa zilizopo katika kata hiyo ya Susuni ni miongoni mwa shule zinazodaiwa wanafunzi kutumikishwa na walimu.

Mwenyekiti wa Kijiji cha Kiongera Lucas Kisairo alipoelezwa tatizo hilo la wanafunzi kufanyishwa kazi  alisema kuwa wananchi kupitia mkutano mkuu walihiari wanafunzi kupelekea walimu kuni na mahitaji mengine kama njia ya kujenga nao mahusiano na kwamba wanawasaidia kuwaboreshea maisha.

Mkuu wa shule hiyo ya msingi Kiongera Daniel Machera alikanusha tuhuma hizo na kudai kuwa hakuna mwanafunzi yoyote anayefanyishwa shughuli za shamba na kwamba kuhusu wanafunzi kupelekea walimu kuni ni makubaliano ya wazazi  na kwamba wanamihitasari ya makubaliano ya wanafunzi kuwapelekea kuni za kupikia na kuwatekea maji.

,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,MWISHO,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,