Mwana Wa Afrika

HOTUBA YA MKUU WA MKOA WA MARA BWANA JOHN TUPPA WAKATI WA KUFUNGUA MKUTANO WA WADAU WA MFUKO WA TAIFA WA BIMA YA AFYA (NHIF) ULIOFANYIKA MKOANI MARA TAREHE 13 APRILI 2012

·       Katibu Tawala wa Mkoa wa Mara

·       Wakuu wa Wilaya zote za Mara

·       Wajumbe wa Bodi ya Mfuko wa Taifa wa Bima ya Afya

·       Mstahiki Meya wa Manispaa ya Musoma

·       Mkurugenzi wa Manispaa na Wakurugenzi Watendaji wa Halmashauri

·       Waheshimiwa Wabunge

·       Mwakilishi toka Wizara ya Afya na Ustawi wa Jamii

·       Mwakilishi wa Mkurugenzi Mkuu Bohari ya Dawa

·       Mganga Mkuu wa Mkoa wa Mara

·       Waheshimiwa Madiwani

·       Wakurugenzi, Mameneja na Maofisa wa Mfuko wa Taifa wa Bima ya Afya

·       Wenyeviti wa Bodi za Afya za Halmashauri

·       Waratibu Mfuko wa Mfuko wa Mfuko wa Taifa wa Bima ya na Mfuko wa Afya ya Jamii

·       Ndugu zangu Waandishi wa Habari

·       Wageni waalikwa (itifaki imezingatiwa)

Mabibi na Mabwana, Asalamu Aleikum, Bwana Asifiwe.

1. SHUKRANI

Waheshimiwa Viongozi na washiriki wa mkutano huu, Awali ya yote napenda niwashukuru viongozi wa Mfuko wa Taifa wa Bima ya Afya kwa kunialika kuwa mgeni rasmi katika mkutano huu muhimu. Kama mwenyeji wa mkoa huu napenda  kuwakaribisha sana Mkoani Mara.

Pia napenda kuupongeza Mfuko wa Taifa wa Bima ya Afya kwa kuadhimisha miaka 10 tangu ulipoanzishwa. Tuliona kupitia vyombo vya habari namna Waziri Mkuu Mizengo Pinda alivyosisitiza umuhimu wa huduma kwa wanachama na usimamizi wa Fedha zitokanazo na NHIF na Mfuko wa Afya wa Jamii (CHF) ili zilingane na ubora wa huduma inayotolewa hivyo nasi ni lazima tulitekeleze hilo.

2. LENGO LA MKUTANO

Ndugu Washiriki wa Mkutano, imedokezwa  katika utangulizi kuhusu lengo la mkutano huu, mimi napenda niwasisitize kuwa mkutano huu ni muhimu kwa mustakabali wa sekta ya afya hapa mkoani na  nchini kwa ujumla. Hii ni kwa sababu sekta ya afya inakabiliwa na changamoto mbalimbali ambazo nyingine ziko ndani ya uwezo wenu. Kama nchi tulishapitisha sera kwamba huduma zetu ni za kuchangia na yale makundi maalum yana utaratibu wao. Kwa kuwa wadau wote wa Mfuko huu mpo hapa ni matarajio yangu kuwa mtatumia nafasi hii kujadiliana kwa uwazi na kwa kina ili mwishoni mwa mkutano kila pande uwe na maazimio yatakayosaidia kuboresha mifuko hii. Lengo letu liwe ni kujadiliana ili kuboresha huduma siyo kutupiana lawama na kutafuta mchawi. Katika suala la kuboresha huduma za afya, kila mmoja wetu anawajibika kwa namna moja au nyingine.

Kwa maana hiyo basi katika mkutano huu natamani washiriki mpate nafasi ya kufanya yafuatayo:

     

·       Mpate taarifa kuhusu mambo yaliyofanywa na Mfuko ndani ya miaka 10, mafanikio na changamoto ambazo bado zipo lakini pia maagizo mbalimbali ya Serikali na mikakati mbalimbali ambayo Serikali imeweka kwa ajili ya kufikia  lengo la Afya Bora kwa wote.

·       Jadilianeni kuhusu mambo mbalimbali yanayohusu uboreshaji wa Huduma Vijijini na Afya kwa wote ambayo Mfuko wameweka kipaumbele katika hilo hasa kipindi hiki ambacho wanaanza safari nyingine ya miaka 10 ijayo.

·       Jadiliane kwa kina umuhimu wa CHF kwa Watanzania huku tukichukua mifano ya halmashauri kadhaa ambazo hivi karibuni zimetunukiwa tuzo ya usimamizi wa fedha na uboreshaji wa huduma kwani hiyo itasaidia sana kuwavuta wananchi kujiunga na CHF na hatimaye kupata huduma za matibabu kwa njia ya kadi.

·       Ni vema pia uongozi wa NHIF ukatueleza ni maeneo gani ambayo mshiriki mmoja mmoja anaweza kuchangia ili kuboresha huduma za afya.

·       Hakikisheni mnatumia uzoefu wenu kutoa ushauri katika maeneo mbalimbali ili Mfuko huu uendelee kuimarika na kutoa huduma stahili kwa wanachama wake.

3. UMUHIMU WA WANANCHI KUWA NA BIMA ZA AFYA

Ndugu zangu Waratibu wa NHIF na CHF mliopo hapa, ninyi ni wataalam zaidi katika suala hili la huduma za matibabu kupitia Mifuko ya Afya ambayo mnakutana na wanachama wa Mifuko hii kila siku. Tambueni kuwa shughuli zenu katika kuelimisha umma kuhusu Mifuko hii zina umuhimu mkubwa katika kufanikisha dhamira ya Serikali ya Watanzania kuwa kwenye utaratibu wa Bima za Afya.

Ni ukweli ulio wazi kuwa gharama za matibabu zinapanda kila uchao, hivyo njia pekee ya kumkomboa Mtanzania ni kumpa uhakika wa kutibiwa yeye na familia yake kupitia mfumo wa Mfuko wa Afya ya Jamii ambao NHIF uko chini yao.

Nawaomba fanyeni kazi zenu kwa moyo mmoja mkijua kuwa mafanikio ya CHF ni ndoto ya kila kiongozi katika ngazi zote za serikali. Tumieni wakati wenu kuelimisha wananchi kuwa, raslimali ndogo walizo nazo za mifugo au mazao wanayozalisha zinaweza kuboresha afya zao kwani hakuna uzalishaji bila uwepo wa Afya bora.

4. HALI YA UCHANGIAJI CHF MKOANI MARA:

Mkoa wa Mara ni miongoni mwa mikoa ambayo wananchi wake wanachangamkia sana fursa za maendeleo kila zinapojitokeza. Lakini kwa bahati mbaya hatujaonyesha mwamko wowote katika kuchangamkia fursa ya utaratibu rahisi wa kuchangia matibabu kupitia Mfuko wa Afya ya Jamii (CHF). Takwimu zinaonyesha kuwa hadi mwezi Disemba mwaka jana, kati ya kaya 237,071 zilizopo katika mkoa wa Mara , ni kaya 1,460 tu ya kaya zilizojiunga na CHF ( hiyo ni sawa na asilimia 0.6) ya kaya zote.  Tunajiuliza tatizo ni nini? Ni kweli wananchi wa mkoa wa Mara hawana uwezo wa kuchangia Shilingi elfu Kumi ( 10,000/=) kwa kaya kwa mwaka? .

Majibu ya maswali haya mnayo ninyi washiriki wa mkutano huu. Tutumie nafasi hii kujadiliana na kupata majibu yatakayotusaidia kuondoa kabisa hapa tulipo.

Kutokana na hayo, kwa mujibu wa takwimu zilizopo hapa, hali ya uchangiaji wa Mfuko wa Afya ya Jamii katika Mkoa huu hairidhishi hivyo kila kiongozi kwa nafasi yake anatakiwa atafakarina kuweza kushauri ni mkakati gani unaweza kutumiwaa ili kuhakikisha hali hii inabadilika na wananchi wanajiunga na Mfuko huu ambao ndio mkombozi wa afya za wananchi.

5.AFYA NA SHUGHULI ZA KIUCHUMI;

Ndugu zangu washiriki wa mkutano huu wa wadau wa Mfuko wa Taifa wa Bima ya  Afya, mkoa wa Mara umebarikiwa kuwa na hali nzuri ya hewa ambapo mazao mbalimbali yanastawi vizuri lakini pia tunalo ziwa ambalo linasaidia shughuli za uvuvi kuendelea na kuongeza pato kwa wananchi wa Mkoa huu, kwa maana hiyo wananchi wa mkoa huu wakati wote wako katika shughuli za uzalishaji kwa njia ya kilimo, uvuvi, ufugaji shughuli ambazo zinawezekana tu endapo afya za wananchi hawa ni njema.

Familia yenye maradhi kila wakati inakosa muda mzuri wa kuzalisha mali, ili familia iwe katika hali bora ya afya ni lazima iwe na uhakika kuwa mmoja wao anapougua ana uwezo wa kwenda kwenye kituo cha matibabu na kutibiwa hata kama hana fedha mfukoni. Uhakika huu wa matibabu utapatikana tu iwapo wananchi wengi watajiunga na CHF na wakishirikishwa katika usimamizi wa huduma kupitia Bodi za Afya.

Naomba katika mkutano huu tujadiliane ni namna gani tutawahamasisha wananchi wa mkoa wa Mwanza kujiunga na CHF na kuhakikisha kuwa wanapokwenda katika vituo vya wanapata huduma zinazostahili.

5. HITIMISHO

Ndugu washiriki kabla ya kumaliza Hotuba yangu naomba mhakikishe yafuatayo yanatekelezwa:-

·       Kuhusu huduma za matibabu: Watoa huduma mhakikishe mnawapa huduma za heshima wanachama wa mifuko hii kwani huduma mnayowapa tayari imelipiwa, watibiwe mapema ili wakawahudumie wananchi wengine.

·       Wanachama muwe walinzi wa huduma zenu na hasa mnapokutana na Dawa zinazotolewa na Serikali zinauzwa katika maduka ya watu binafsi, toeni taarifa kwa wahusika ili hatua stahili zichuliwe.

·       Watoa huduma fanyeni kazi zenu kwa uadilifu na kuwabaini wote wanaotumia au kufanya udanganyifu katika vitambulisho vya matibabu kwa lengo la kuusaidia Mfuko kuondokana na gharama zisizokuwa zake.

·       Waajiri hakikisheni mnawaandaa watumishi wanaokalibia kustaafu ili waweze kurejesha vitambulisho vya Mfuko na kufuata utaratibu uliowekwa katika kupata kitambulisho kipya.

·       Pia himizeni waajiriwa wapya kujaza fumo za uandikishaji ili wapate  vitambulisho kutoka Mfuko wa Taifa wa Bima ya Afya kwa lengo la kuondoa malalamiko yasiyo na tija.

·       Dawa zitumike vizuri na kuratibiwa katika ngazi mbambali. Jadilianeni kwa kina kuhusu suala hili na mtoke na mkakati wa pamoja kwani bila uwepo wa dawa, wanachama watapunguza imani na huduma hizi.

·       Malengo ya uandikishaji Kaya: Kila Halmashauri iwe na lengo la uandikishaji wa kaya kujiunga na CHF na taarifa hizi nizipate kwa ajili ya ufuatiliaji zaidi.

·       Kwa Halmashauri ambazo ziko nyuma na mpango huu, viongozi husika nendeni mkajipange na mliweke suala hili katika vipaumbele vyenu na mimi kama Mkuu wa Mkoa naahidi kulifuatilia kwa ukaribu zaidi ili kuona utekelezaji wake.

·       Kwa Mfuko wa Taifa wa Bima ya Afya: Hakikisheni huduma ya Tiba kwa Kadi Mijini zinaimarishwa na mpango wenu wa elimu uelekee zaidi vijijini ili wananchi wengi wahamasike na huduma zenu.

·       Taarifa za mapato na matumizi ya fedha za CHF: Waheshimiwa wabunge na madiwani ombeni taarifa za Fedha zitokanazo na Mfuko huu ili muweze kufuatilia matumizi yake.

·       Suala la CHF lifanyeni kuwa agenda ya kudumu katika vikao vyenu na angalieni namna ya kutunga sheria ndogo ndani ya Halmashauri ambazo zitawataka wananchi kujiunga na Mfuko huu.

·       Kama Mkuu wa Mkoa, naahidi ushirikiano mkubwa kwenu kama NHIF na mlango wangu uko wazi wakati wowote. 

           AHSANTENI KWA KUNISIKILIZA