Mwana Wa Afrika

KAMATI ZA MAAMUZI ZA VIJIJI  ZISIINGILIWE KWENYE MAJUKUMU YAKE .

Dinna Maningo,Tarime

WENYEVITI wa Vitongoji,Vijiji na Watendaji wa  Vijiji na Kata  katika kata ya Bumera Wilayani Tarime Mkoani Mara wamedaiwa kuchangia kuwepo kwa migogoro ya Ardhi kutokana nakuwa wamekuwa wakihusika  kufanya maamuzi ya uuzaji na ugawaji wa ardhi kinyume cha sheria.

Hayo yalibainishwa na wananchi wa kata ya Bumera kutoka kijiji cha Turugeti,Kitenga na Kwisarara wakati wakipatiwa Semina ya mafunzo ya udhibiti wa migogoro ya ardhi yanayoendeshwa na kituo cha Sheria na haki za Binadamu Tarime (SHEHABITA) kwa ufadhili wa Foundation for Civil Society,yaliyofanyika katika ofisi ya Kata ya Bumera iliyopo kijiji cha Kitenga.

Wananchi hao walisema kuwa kumekuwa na tabia ya Wenyeviti,na Watendaji kuingilia kazi za kamati ya maamuzi za vijiji wakati wa maamuzi ya migogoro ya ardhi.

“Kuwepo kwa migogoro ya ardhi kunatokana na hawa Wenyeviti, na Watendaji kujichukulia maamuzi wao wenyewe ndiyo uhusika kuuza na kugawa ardhi matokeo yake wanashindwa kusuluhisha migogoro Wenyeviti ni mahodari wa kugawa ardhi”alisema Lucus Chacha mkazi wa Turugeti.

Josephu Magaigwa Mkazi wa kijiji cha  Kitenga alisema tatizo lingine linalochangia kuwepo kwa mgogoro wa ardhi Bumera unatokana na Kamati ya Fedha, Mipango na Uchumi za Kijiji kuwa ndiyo wagawaji wa ardhi.

Pia walisema  kutokuwepo kwa mipaka ya haki ya njia imechangia mgogoro na kuwa kero kubwa kwa wananchi kutokana na baadhi ya watu wamekuwa wakiziba njia hali inayosababisha usumbufu kwa watu na mifugo inayokwenda malishoni.

“Kuna mgogoro mwingine wa ardhi ambayo ni njia kumekuwa na tabia  ya baadhi ya watu kuziba njia  kwenye makazi yao watu wanakosa mahali pa kupita na hata kupitisha mifugo yao inaleta usumbufu tunazunguka mbali nawakati kuna njia halali za mkato ambazo zimezibwa na unapomwambia mtu azibuwe inakuwa ni mgogoro mkubwa”alisema Nyamuhanga  Kisiri mkazi  wa Kwisarara.

Rhobi Wambura mkazi wa Kijiji cha  Turugeti alisema kuna watu walihamishwa kwenye makazi yao wakati wa oparesheni vijiji mwaka 1974 ambapo imesababisha kuwepo na tatizo la kugombea eneo na hivyo kusababisha migogoro ya ardhi.

‘Kuna watu walihamishwa kwenye makazi yao wakati wa oparesheni vijiji wakaondoka  baadae ardhi walizoziacha zikakaliwa na watu wengine watu wameishi kwenye maeneo hayo zaidi ya miaka 15 leo hii wale waliohamishwa wamerudi na kudai ardhi kuwa ni ya wazee wao hali inayoleta mgogoro alisema Rhob Wambura.

Anaongeza” Kibaya zaidi kuna mgogoro mwingine kuna mkazi mmoja aishiye Tarime mjini alihama Turugeti kitambo eneo likabaki wazi akahamia mtu mmoj kipindi cha oparesheni vijiji ameishi zaidi ya niaka 15 leo hii anaambiwa na Mahakama ya Ardhi na Nyumba Wilaya ya Tarime aondoke kwenye eneo kapewa siku tano awe amehama yeye na familia yake aondoke aende wapi na anafamilia! Unafikili kinachofata ni nini ? nimapigano kwa sababu ametafuta haki yake hadi mahakama ya ardhi ya nyumba wilayani imekosekana anaambiwa anatakiwa kuachia eneo”alisema

Kwa upande wa wajumbe wa kamati ya maamuzi ya vijiji walisema  kutokana na kutofahamu sheria wameshindwa kuwajibika katika uamuzi wa migogoro kutokana na kutojuwa aamajukumu yao ya kazi jambo ambalo limepelekea Halmashauri za kijiji kutekeleza majukumu yasiyo yao kwa kile wanachoamini wenyeviti na Watendaji ndiyo wahusika pekee katika utatuzi na ugawaji wa ardhi.

Bonny Matto ambaye ni mkufunzi wa mafunzo aliwataka viongozi wa Serikali za Vijiji kuacha tabia ya kugawa na kuuza ardhi bila ridhaa ya wananchi huku akiwasisitiza wananchi kuacha tabia ya kuuza ardhi bila kushirikisha Halimashauri za kijiji ambayo imekuwa ikisababisha  kugombea ardhi na kusababisha mapigano ambapo alikazia kuwa tabia ya kupigana kwa kukatana mapanga si njia sahihi ya kutatuwa migogoro.

“Kwanini watu wakatane mapanga kwa sababu ya ardhi je toka watu wapigane wamenufaika na nini? Hakuna manufaa yoyote matokeo yake watu wanamwaga damu wanakufa na kuacha familia zikiishi kwa mateso,njia pekee ni ya usuluhishi wa matatizo ni vyombo vya utatuzi wa migogoro ya ardhi kuna mabaraza ya ardhi ya kijiji,mabaraza ya kata, mahakama ya ardhi na Nyumba wilaya,Mahakama kuu na mahakama ya Rufaa nendeni huko mkatapate haki zenu.

Anaongeza” hili tatizo la mipaka ya njia ni kazi ya kamati ya maamuzi ya kijiji wao ndiyo wanatakiwa kuweka mipaka wanapoweka mipaka wanatakiwa kuacha haki ya njia,haya matatizo yanakuwepo kwa sababu ya kuuziana ardhi kiholela bila utaratibu Halmashauri za kijiji zifuate taratibu za kisheria na wawajibike kwa nafasi zao wasikumbatie madaraka yote wagawane madaraka mgogoro wa ardhi utakoma pia kisheria mtu anapoishi kwenye eneo zaidi ya miaka 12 ardhi hiyo ni halali hapaswi kunyang’anywa na mtu yeyeote akifanya hivyo amevunja sheria ya ardhi ya vijiji No 5 ya mwaka 1999.alisema Matto.

Kabla ya kuanzishwa kwa mkoa wa kipolisi Tarime/Rorya Kata ya Bumera ni miongoni mwa Kata zilizokubuhu kwa migogoro ya ardhi iliyosababisha mapigano ya koo baina ya koo ya Wamera na Wahunyaga,Wamera na Wajaruo,Wahunyaga na Wasweta,ambapo sababu ya mapigano ni kutokuwepo kwa mipaka halisi baina ya kijiji na kijiji ambapo mpaka sasa serikali bado haijabainisha mipaka halisi ikiwemo mipaka ya haki ya njia inayoendelea kusababisha migogoro ya ardhi.

,,,,,,,,,,,,,,,,,,,,,,,,,,,,,,,,,,,,,,,,,,,,MWISHO,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,