Mwana Wa Afrika: NBC YADHAMINI YATOA SOMO LA UJASIRIAMALI KWA WANAWAKE WA TANGA

Mkuu wa Mkoa wa Tanga, Chiku Galawa (kushoto) akipokewa na Mkuu wa Kitengo cha Huduma za Fedha zinazofuata Kanuni za Kiislamu ‘NBC Islamic Banking’ cha Benki ya Taifa ya Biashara, Yassir Masoud alipokwenda kufungua semina ya siku moja kwa wanawake wajasiriamali waislamu iliyoandaliwa na NBC mjini Tanga leo. Katikati ni Meneja Tawi la NBC Tanga Deusdedit Mashalla.

Baadhi wa washiriki wa semina ya siku moja iliyoandaliwa na Benki ya NBC Kitengo cha Islamic Banking wakiwa katika semina hiyo jijini Tanga leo.

Mkuu wa Mkoa wa Tanga, Chiku Galawa akifungua semina ya siku moja kwa wanawake wajasiriamali waislamu iliyoandaliwa na Benki ya NBC Kitengo cha Islamic Banking mjini Tanga LEO. Kulia ni Mkuu wa kitengo hicho, Yassir Masoud na kushoto ni Meneja Operesheni wa NBC Tawi la Tanga Kibibi Said Kibao.

Na Mwandishi Wetu

Benki ya Taifa ya Biashara (NBC) kupitia kitengo chake cha Huduma za Kibenki zinazofuata kanuni za kifedha za Kiislamu inatarajia kuanzisha huduma ya mikopo kwa wafanyakazi ‘Islamic Group Finance’ kabla ya Septemba mwaka huu.

Akizungumza wakati wa semina ya siku moja ya wanawake wajasiriamali wa Kiislamu jijini Tanga jana, Mkuu wa Islamic Banking wa NBC, Yassir Masoud alisema lengo la kuanzishwa kwa huduma hiyo ni kutoa fursa za mikopo kwa wateja wao wanaohudumiwa kwa kufuata kanuni za dini hiyo.

Masoud aliwaambia wanawake waliohudhuria semina hiyo kwamba ili waweze kujikwamua kiuchumi, wanahitaji kujifunza mbinu za biashara, akisisitiza kwamba hata mafundisho ya Kiisllamu yanatoa maelekezo kuhusu utafutaji wa riziki.

”Uislam umehimiza mambo ya uwekezaji, Uislamu unahimiza masuala ya mali maandiko yakisema kwamba kutafuta riziki ni sawa na kutafuta fadhila za Mwenyezi Mungu,” alisema.

Akifungua semina hiyo, Mkuu wa Mkoa wa Tanga bibi Chiku Galawa aliwahimiza wanawake mkoani humo kujizatiti kwenye ujasiriamali ili kusaidia juhudi za serikali katika kuinua maendeleo yasiyoridhisha ya mkoa huo.

Alisema kuwa kwa kupitia semina hiyo, NBC imefungua njia mpya yenye matumaini kwa wanawake wa Tanga, njia ambayo mashirika mengine yanapaswa kuifuata.

“NBC ni moja kati ya benki kongwe yenye mtanda mpana kuliko zote nchini na imekuwa mstari wa mbele ikishirikiana na watu mbalimbali katika kuboresha maisha ya Watanzania,” alisema.

Katika siku za hivi karibuni, NBC imekuwa ikiwekeza zaidi katika kuelimisha jamii, hususan wajasiriamali kupitia semina na warsha mbalimbali huku ikishirikiana na makampuni mengine.

Mwishoni mwa mwaka jana, benki hiyo iliandaa mkutano wa wajasiriamali wadogo wadogo wa jijini Dar es Salaam kwa ushirikiano na shirika lisio la kiserikali linalojishughulisha na vijana, YESi.

NBC pia ni wadhamini wa Top 100 Midsize Companies Survey ambayo inaendeshwa kwa ushirikiano na KPMG kuyasaka na kuyazawadia makampuni ya kati yanayokuwa kwa kasi.

“Sekta ya Biashara ndogo ndogo na za kati ni muhimu katika kukuza uchumi nchini, na ni sekta inayoweza kutoa nafasi za ajira kwa wananchi wengi. NBC wametambua hilo,” alisema.

Aliishukuru benki hiyo na kuishauri iendelee kutoa mafunzo kwa wahusika wa sekta hiyo na kuwawezesha wajasiriamali kukuza biashara zao na hatimaye kuinua uchumi wa nchi.

Rais Kikwete amwapisha Mwenyekiti wa Tume ya Kurekebisha Sheria na Mabalozi Wapya wanne

Rais Dkt.Jakaya Mrisho Kikwete leo ikulu jijini Dar es Salaam amemwapisha Jaji Aloycius Mujuluzi kuwa Mwenyekiti wa tume ya kurekebisha sheria pamoja na mabalozi wanne watakaoiwakilisha Tanzania nje ya nchi.Mabalozi walioapishwa leo ni pamoja na Balozi mpya katika umoja wa Falme za kiarabu(UAE) Mbarouk Nassor Mbarouk,Balozi mpya wa Tanzania nchini Uholanzi Wilson Masilingi,Balozi mpya wa Tanzania katika visiwa vya Commoro Chabaka Kilumanga na Mwakilishi wa kudumu Tanzania Umoja wa mataifa Geneva Balozi Modest Jonathan Mero.

Rais Dkt.Jakaya Mrisho Kikwete,Makamu wa Rais Dkt.Mohamed Gharib Bilal na Waziri wa Mambo ya Nje Bernard Membe wakiwa katika picha ya pamoja na mabalozi wapya waliopaishwa leo ikulu jijini Dar es Salaam.aliyesimama mbele kushoto no Balozi Liberata Mulamula anayekuwa Balozi Mpya wa Tanzania nchini Marekani.Waliosimama nyuma kutoka kushoto ni Balozi mpya wa Tanzania Uholanzi Wilson Masilingi,Balozi mpya wa Tanzania katika visiwa vya Commoro Chabaka Kilumanga,Mwakilishi wa kudumu wa Tanzania Umoja wa Mataifa Geneva Balozi Modest jonathan Mero na Balozi mpya wa Tanzania katika falme za Kiarabu(UAE)Mbarouk Nassor Mbarouk.Kabla ya uteuzi Balozi Liberata Mulamula alikuwa msaidi wa Rais Masuala ya kidiplomasia na aliwahi kuwa katibu mkuu wa nchi za Maziwa Makuu.(picha na Freddy Maro)