Mwana Wa Afrika

 WANA CCM WATAKIWA KUKUBALIANA NA MATOKEO KATIKA CHAGUZI

Na Shomari Binda
Musoma.

Mjumbe wa Halimashauri kuu ya CCM Taifa (NEC) kutoka Mkoa wa Mara Vedastus Mathayo amewataka wana CCM kukubaliana na matokeo katika uchaguzi wa ngazi ya Chama kuanzia ndani ya Jumuiya ili kuepusha makundi ambayo yanaweza kujitokeza na kuibua malumbano yasiyo na msingi.

Kauli hiyo ameitoa jana wakati  akifungua mkutano mkuu wa uchaguzi wa Jumuiya ya Wanawake wa CCM Musoma Mjini (UWT) katika ukumbi wa mikutano wa CCM katika Makao makuu ya chama hicho Mjini Musoma.

Amesema mwanachama yeyote anapoingia katika kinyang'anyiro cha uchaguzi ni budi kukubaliana matokeo ya namna mbili kushinda na kushindwa na kuacha kujiingiza katika makundi ya kutafuta mchawi mara baada ya uchaguzi.

Amedai kushinda na kushindwa ndio maana ya uchaguzi na kuwataka wale walioomba nafasi kukubali matokeo ya namna hizo mbili na kutoa ushirikiano kwa wale walioshinda katika kufanya kazi za jumuiya na zile za Chama katika shughuli za kila siku.

Mathayo amesema kujiingiza katika makundi yakutafuta sababu za kushindwa mara baada ya uchaguzi kutaibua mambo ambayo yataweza kukidhohofisha chama na kushindwa kufanya mambo ya msingi katika kukijenga.

Uchaguzi wa jumuiya ya Wanawake wa CCM (UWT) umefanyika jana katika Wilaya zote za Mkoa wa Mara huku Wanawake wa Chama hicho wakiwania nafasi mbalimbali huku uchaguzi mwingine wa Jumuiya ya Vijana wa Chama hicho (UVCCM) ukitarajiwa kufanyika siku ya kesho.

Katika hatua nyingine Mjumbe huyo wa Halimashauri kuu ya CCM Taifa (NEC) Vedastus Mathayo amechukua fomu ya kutetea nafasi yake katika Ofisi ya CCM Musoma Mjini na kusema kuwa kila Mwanachama wa Chama hicho anayo haki ya kuomba nafasi yeyote ya uongozi ndani ya Chama